«Тундук» ААК Сот системаларын санариптештирүү департаментинде «Кыргыз Республикасынын судьяларынын кызмат ордуна талапкерлерди электрондук тандоо» (АМТ) автоматташтырылган маалыматтык тутумунун тесттик версиясынын презентациясы болуп өттү.

Жаңы система «Түндүк» ААКнын Сот системасын санариптештирүү департаменти тарабынан иштелип чыгып, судьяларды конкурстук электрондук тандоо тартибинин ачык-айкындуулугун, калыстыгын жана натыйжалуулугун жогорулатууга багытталган.

Презентация учурунда программистер платформаны түзүүнүн негизги этаптарын аяктап, аны пилоттук ишке киргизүүгө даяр деп көрсөтүштү. Кыргыз Республикасынын Сот адилеттиги иштери боюнча кеңешинин мүчөлөрүнө системаны апробациялоо жана анын белгиленген талаптарга шайкештигин баалоо үчүн тесттик эсептик жазуулар берилди. Катышуучулар АМТнын функционалдык мүмкүнчүлүктөрү менен таанышышты, ошондой эле аны мындан ары өркүндөтүү боюнча сунуштарын жана пикирлерин билдиришти. Иш-чаранын алкагында бул система менен иштөөнү тааныштыруу жана көрсөтүү да өткөрүлдү.

Судьяларды тандоо системасындагы мыйзамдарга киргизилген өзгөрүүлөргө өзгөчө көңүл бурулду. 5-декабрдан тартып судьялык кызмат орундарына талапкерлердин резерв институтун киргизүүнү караган өзгөртүүлөр күчүнө кирди. Бул квалификациялуу адистерден кадрдык резервди түзүүгө жана аларды биринчи инстанциядагы соттордун бош судьялык кызмат орундарына ыкчам дайындоого мүмкүндүк берет

Сынак өткөрүү тартиби да өзгөртүлдү: эми ал жалпы резервди түзүү менен конкреттүү вакансияларга байланыштырбай жарыяланат. Сынак төрт этаптан туруп, электрондук тандоонун бардык этаптарында санариптик технологиялар активдүү колдонулат, бул адамдык фактордун таасирин азайтууга мүмкүндүк берет.

Автоматташтырылган системаны жана биринчи инстанциядагы соттордун судьяларынын кызмат ордуна талапкерлердин резервин түзүүнүн жаңы механизмин киргизүү сот тутумун модернизациялоодо жана судьялар корпусун сапаттуу тандоону камсыз кылууда маанилүү кадам болот.